التفاهم بدلا من العقاب

العقاب

الحاجة الوحيدة اللي بيأدي ليها انه بيخلي السلوك السلبي سلوك سري

العقاب بيجعل السلوك يتوقف امام الأهل و لكن لا يمنعه كليا

و الأولاد هيتحولوا الي خبراء في اخفاء السلوك السلبي امام أهلهم

بدل ما تخلي الطفل يبطل يعمل السلوك السلبي خوف منك و من العقاب خليه يبطل يعمله اقتناع داخلي ورغبه من جواه

وده اللي بيفرق من طفل للتاني لما يكبروا ، في أشخاص بيكونوا عندهم رادع داخلي ويمتنعوا عن السلوك السلبي حبا لله و في أشخاص لازم يكون في قانون و عقوبة علشان يلتزموا

عايزه تخلي طفلك يغير سلوكه يبقي يكون عندك استراتجية غير العقاب و الإستراتجيات كتير و دي مثلا واحدة منهم

١- حددي السلوك اللي عايزه الطفل يعدله ، مينفعش أقول عايزه اعدل سلوك الإهمال الصح أقول عايزة ابني يتعود يحط هدومه و لعبه في مكانها ، كوني محددة

٢-اطلبي من ابنك اللي انتي عايزاه بالضبط و اشرحيله يتعمل ازاي ، يعني علميه ازاي يعلق هدومه و يرتب لعبه و اعمليها قدامه و خليه يشارك مره و اتنين وثلاثة

٣-امدحي سلوك طفلك حتي قبل ما يعمله و امدحي مشاركته معاكي حتي لو بسيطة جدا ، امدحي السلوك مش تمدحي الطفل ، يعني متقوليش انت مرتب و منظم قولي حاجة حلوه قوي و هايلة انك ترتب و تنظم حاجاتك و تساعد مامتك

٤- تابعي مدح السلوك الجديد لفترة علشان الولد يكون فاكره لغاية ما يتعود عليه

٥- انقلي الصراع لشئ محايد ، يعني لما تقولي لو عملت كذا هعمل فيك كذا كده انتي طرف و طفلك طرف و الطرفين قصاد بعض و ده غلط ، الصح انك تكوني انتي و طفلك في نفس الجهة قصاد شئ محايد هو الحكم بينكم
يعني مثلا في موضوع الترتيب خلي انتي و ابنك طرف و شكل الغرفة طرف ، يعني تقوليلة انا عايزة اعملك كذا بس شوف شكل الغرفة ، كده بقي شكل الغرفة الحكم بينكم
أو مثلا وقت النوم الحكم بينكم هي الساعة ، يعني لما يجي موعد النوم هتقولي له تعالي نشوف الساعة شوف بقت ٧ خلاص جه ميعاد النوم اعمل ايه

٦-لما تكوني في فترة تعديل سلوك ما ، من الصح انك تكوني موجودة أغلب الوقت مع الطفل لأن فترة التواجد هتسمح ليكي بمتابعة التنفيذ و المدح و تفكري الطفل بالسلوك الجيد كل شوية

٧- بلاش تبقي قلبك إسود و كل شوية تفكرية بالسلوك السلبي اللي عمله من شهر لأن تكرار ذكره بيزيد من إحتمالية تكراره ، السلوك السلبي ينتهي الكلام عنه نهائي و التركيز فقط علي السلوك الإيجابي الجديد

خلينا بقي نحلل جملة ( إياك أشوفك تعمل كدة تاني )

١- انك كأم طرف صراع قصاد طفلك و ده هيأثر بشكل سلبي علي العلاقة و رصيد الثقة بينكم
٢- لم تذكري السلوك الإيجابي المطلوب من الطفل عمله و لا كيفية عمله
٣- لم تذكري أهمية و فوائد السلوك الإيجابي
٤-حولتي تركيز الطفل الي الخوف من انك تشوفيه و بكده بيتعود الطفل ان الرادع دايما يكون خارجي مش داخلي

هذه الجملة لن تعطيكي أي نتايج إيجابية و لو اعتقدتي انها تسببت في توقف الطفل عن عمل السلوك فأنتي واهمة بل حولته الي شخص بارع في الإخفاء

الأم و سلوكها مع طفلها هو اللي بيربي شخص عنده ضمير أو لا