لكل ام لسه والده بقالها 15 يوم او هتولد ان شاء الله قريب

كلامى لكل ام لسه والده بقالها 15 يوم

او هتولد ان شاء الله قريب 

اولا : اول 3 ايام او 5 ايام لحاد م الام ربنا يرزقها بحليب فى الثدى
بيكون اغلب بكاء الطفل سببه الجوع
و بالتالى العلاج الوحيد هو الرضاعه و من هنا بقول لكل ام - حتى لو لبنك اتأخر - حطى طفلك على ثديك و متزهقيش - اعملى اللى عليكى و ربنا هو اللى بيرزق - اللى عليكى يعنى - السوائل بكثره و الحلبه اكتر من تورمس - كلنا عارفينه- و نص كيلو لبن طبيعى على الاقل و و الماء بكثره و حتى لو اللبن قليل - اللى هو السرسوب - مفيش مشكله - المهم الام تعمل اللى عليها - ترضع كل نص ساعه ان امكن - و هى قاعده فى اكتر وضعيه مريحاها
و اكل الخضار الورقى - اما علشان ميجيلهاش امساك او علشان مدرات اللبن زى الجرجير و البقدونس
لكن الامهات اللى بتقول معنديش نفس و مش قادره او مبحبش الالبان و لا جايلى نفس - كدا يبقى مشكله المشاكل
الطفل المفروض يرضع حلييب - مش اعشاب و جلوكوز و الكلام دا
اصح كلام اتعلمناه : الطفل بياخد رضعه او اتنين جلوكوز لحين م الام تفوق من البنج بعد كدا لازم خلال ساعتين تقوم تلامس الطفل مع سدرها و تبتدى ترضع حتى لو مفيش حاجه بتنزل - المهم يحصل التلامس لان بعض الامهات بتكون خايفه
و نصيحتى دايما للامهات : اوعى تخافى او تزهقى - انتى كويسه و زى الفل ان شاء الله - و طفلك دا ملوش بعد ربنا غيرك - و تعملى حسابك - لبنك كتير او قليل مش مشكلتك - خفيف او تقيل مش شغلتك

شغلانه الام : انها ترضع فى اول 10 ايام بانتظام فى المواعيد كل ساعه او اتنين او تلاته على حسب الطفل - و ممنوع النوم للطفل اكتر من 3 ساعات علشان ميعودش على الصيام من بدرى و الام ترضع الطفل على الاقل دقيقتين فى الايام الاولى لان الطفل بينام منها - نلاعب الطفل - و نحاول نصحيه - مره و اتنين - و منزهقش و نجرب تانى و عاشر - ايه المشكله

الاعشاب بلاش منها فى اول اسبوعين
ليه
علشان محتاجين ان الطفل مينقصش فى الوزن - لانه بعد الولاده الوزن بيقل شويه حوالى 10% من وزن الولاده و محتاجين خلال اسبوع انهيرجع يزيد الوزن دا

ثانيا محتاجين نعلم الام ان طفلها لازم يرضع طبيعى و بانتظام و بالتالى الاعشاب و الببرونه و الكلام الجميل دا مش وقته

اهم من دا كله
ان الصفرا بتيجى للاطفال فى اول 3 ايام و بتستمر لحاد اسبوع
و علاجها الاول و الاخير هو الرضاعه الكتير و بانتظام و - بنشوفها لما طفل بيدخل الحضانه علشان الصفرا - بيعمل ايه لما بيطلع - بيبقى مفجوع على الرضاعه - و دا المطلوب من كل الماميز و خصوصا الجداااااااااااااااااد لاول مره

كمان الرضاعه بدرى
ليها فوايد كتيره تانيه
بتساعد الام على الراحه النفسيه
تقليل الالم اللى بييجى للام فى اول يومين من تكوين الحليب و الشعور بالالم فى الثدى
تقليل عدد الايام اللى بيكون فيها نزيف مابعد الولاده
دا شغل نسا مليش فيه
لكن شغلتى انا
بتحسن وظائف التنفس عند الطفل
تظبيط نسبه السكر فى الدم
النمو عند الاطفال
لبن السرسوب كويس كدا فى المناعه عند الاطفال حديثى الولاده
و مننساش
انه بيساعد المولود على انه بيطرد البراز الاسود - العقى - من بطن الطفل و بيتدى ينزل الستولز - البراز يعنى - بألوانه المختلفه - اصفر او اخضر - سايل او مخرز - مره فى اليوم - الى 7 مرات
كل دا طبيعى و مفيش اى قلق

لكن ضروووووووووووووورى
الطفل فى اول 3 ايام
نطمن عليه عند دكتور الاطفال اللى هنتابع معاه
علشان ان شاء الله يشوف لو فيه مشاكل عند الطفل
يشوف الحلق
التنفس
القلب
البطن
الاعضاء التناسليه
الشرج علشان نطمن

نسيت اقول
ايه اللى يحصل لو الحليب عند الام اتأخر
رجاء بلاش واحده تقولى انا سلفتى ولا اختى عندها بيبى عنده سنه و هترضع البيبى للحاد مينزلى لبن - رجاء بلاش - علشان مش هو دا اللبن اللى الطفل بيحتاجه ثانيا - ممكن الدنيا دى كلها تعمل تلوث للطفل اللى لسه جاى

و بعدين لازم نعرف ان البنت اللى بتولد طبيعى ممكن تجيب لبن على اليوم الثالت
و القيصرى ممكن على الثالث او يتأخر حاجه بسيطه
لكن البكريه ممكن تتأخر شويه و بالتالى هنحتاج ساعتها تدخل
بالحليب الصناعى و دا مينفعش من دماغنا
بمعرفه الدكتور
طيب اديه بالببرونه يا دكتور ولا بالسرنجه
ياريت بلاش الببرونه لان الطفل ممكن يتعود عليها - دا كلام ممكن يحصل لكن دا مش قانون - عرفنا نرضع بالسرنجه او بالببرونه مش خناقه = اللى نقدر عليه المهم انه يكون فى اقل الحدود و انا الام زى الشاطره بتعمل رضعه او اتنين فى اليوم
لكن محاوله الطبيعى منها كل ساعه زى مقولنا علشان الطفل ميتعودش على الحاجه السهله و ميزهقش
و الصناعى : اول م الام اللى سمعت الكلام و ربنا رزقها بالحليب - علبه اللبن اللى عندنا - اما نرميها او لو لينا حد يعرف يدخلها حضانه حكومى - فيها اطفال غلابه - نوديها و معاها علبه كمان - يمكن ربنا يفادى البيبى بتاعنا من حاجات كتيره

طبعا انا طولت و مينفعش اتكلم هنا عن اللبس و الحموم و الهدايا و الطهاره للذكور و الفيتامينات و الكلام دا

نسيت اقول
كل الادويه اللى بتتاخد للطفل لو جه له صفرا فى اول اسبوع
دى تحصيل حاصل و مش هى العلاج
الرضاعه هى الاساس و ضرورى المتابعه مع الدكتور كل يومين لحاد م تبقى كل الامور هاديه و مستقره

اكرر كلامى
الموضوع كله محتاج صبر و سمعان كلام و اجتهاد و توكل على الله - لان الرضاعه دى مش مسأله ام بتحط طفلها على ثديها وخلاص
دى مشكله كبيره و لو متعملتش صح
الخسرانين فيها كتير
الام لانها هتفقد احساس الامومه و هى بترضع
الطفل و الغذا الربانى اللى كله مناعه و فوايد
الاب الغلبان اللى هيتخرب بيت اهله حليب صناعى
و انا علشان مشاكل الرضاعه سواء الرضاعه الطبيعى او الصناعى - مغص - ارتجاع - التهابات اذن - عدم انتظام النوم - عصبيه الام و الطفل -

على اى حال ارجو انى اكون عرفت اوصل موضوع للناس يمكن افيد بيه اى حد
و اللى مستفادش - ميزعلش منى -

انتظروا باقى الحكاوى - اللى بينى و بين الاهالى و الاسئله اللى بتتكرر فى البيوت و العيادات

نسيت اقول حاجه
الرضاعه ملهاش علاقه بحجم الثدى او الحلمه - طالمه مهياش مسح او مقلوبه - ولا بجسم الام - رفيعه او تخينه - دى مسال فرديه
و الام لما بتيجى ترضع طفلها - بلاش نقول الطفل مبيعرفش يمسك على الحلمه - لان الطفل مبيمسكش الحلمه بس - شوفوا الطفل بياخد الحلمه الصناعى كلها فى بوقه قد ايه - نفس الكلام من ثدى الام - الحلمه و اللهاه - المنطقه الغامقه ورا الحلمه - لازم تتمسك و تتزق كويس داخل فم الطفل علشان يعرف يمسك كويس و يرضع ان شاء الله

منقول من د /هاني عصام