الطفل من الولادة الى تلات اشهر:
على الجانب البدني:
1. يقدر يمسك الالعاب اللي بتصدر اصوات زي الشخشيخة
2. يقدر يرفع رأسه و صدره عند الاستلقاء على البطن (دا بنهاية المرحلة دي)
3. متابعة الاشياء المتحركة بالعين
4. فرد الاطراف
5. الرغبة في التحفيز البصري
6. يرى الاشياء على مسافة 25 سنتيمتر
على الجانب الاجتماعي والعاطفي:
1. يستجيب للأصوات المألوفة بالنسبة له
2. التركيز مع اوجه المحيطين
3. التفاعل مع الاشخاص المألوفة
4. التبسم في وجه الاشخاص المألوفة
5. يحب ملامسة الاشخاص و الاشياء لبشرته
على الجانب الذهني:
• اكتشاف علاقته بالايدين والقدمين (يعني الحاجات دي بتاعتي و اقدر احركها)
• يتستمع بملامسة الانسجة المختلفة
• يدرك وجود جانب ايمن و ايسر
• يبدأ يربط الاصوات بمصادرها
• يميز الاصوات والنبرات و يعرف النبرة الفرحة و النبرة الحزينة
الألعاب المناسبة:
• العاب تصدر اصوات و تمتاز بالألوان و الملمس المختلف، و نتأكد ان لو دبدوب ولا حاجة ما يكونش فيها زراير عشان الأمان
• ممكن نلاعبة بالشخشيخة اننا مش بس نهزها بل نحركها من اليمين للشمال عشان يتابعها
• في ضوء منخفض للغرفة ممكن نجيب كشاف و ننور الكشاف الصغر و نسلطه على الاشياء و هانلاقي الطفل بيتابع النور
• ممكن نعمل للطفل تمارين لايديه ورجليه و احنا بنغني له
• و طبعا ممكن نعمل له ماساج قبل النوم وبعد الاستحمام بزيت زيتون او بزيت بيبي و نغني له و نضحك و هو مع الوقت هايتسجيب للحاجات دي
• في الفترة دي مهم جدا اننا نبدأ نعمل روتين للطفل، لان الروتين بيدي للطفل شعور بالاطمئنان، واول روتين نقدر نعمله هو روتين النوم، كل يوم بالليل لازم الطفل يغير هدومه كلها، و يعمل له ماساج و نقرأ له المعوذات او نحكي حدوتة (حتى لو مش بيفهم دلوقت) ونغني اغنية طفولية و نوطي نور الاوضة و ينام. و بعدين كل ساعتين نصحيه يرضع. و طبعا بقى الكل عارف فوائد الرضاعة الطبيعية
اه و من اهم الحاجات اللي لازم نتجنبها ان الطفل يشرب اي حاجة تم تحليتها بالسكر او الشاي الجاهز اللي في الصيديلات دي كلها اشياء بتخليه يطلب المزيد من السكر والسكر بيأثر على انتباه الطفل بشكل كبير.
الفترة دي غالبا بتكون هادية و الطفل بينام عدد ساعات كويس
• الشهر الأول بينام فترة 8 ساعات نهارا و 8 ساعات ليل
• 3 أشهر: بينام 9 ساعات ليلا و 6 ساعات نهارا
المرحلة التالية:من 3 إلى 6 أشهر:
على الجانب البدني يستطيع الطفل:
1. الاهتزاز على الارض
2. التدحرج في كلا الاتجاهين
3. يمسك الاشياء اللي في متناول ايده
4. يرفع راسه لفترة طويلة
5. يلعب بإيديه ورجليه
6. يفهم تماما ان ايديه ورجليه دول جزء منه
على الجانب الاجتماعي والعاطفي
1. بيبتدي يجرب يتكلم ويطلع مقاطع صوتية زي با ما تاااا و هنا مهم نديله اهتمام لما يعمل كدا عشان يستمر في التدريب على الاصوات دي
2. يستجيب للاشارات الصوتيه و ممكن يستجيب لما حد ينادي اسمه
3. يستجيب للابتسامات ويبتسم في المقابل
4. يركز اوي في الفم و هو بيتحرك
على الجانب الذهني
1. يدرك ان لكل حد اسم معين، يعني بابا هو بابا، ماما هي ماما مع انه مش بيعرف ينطق بس عارف
2. يدرك البيئة المحيطة و يدرك اوضته او الاوضة اللي بيقعد فيها كتير ويشعر فيها بالراحة (وبالتالي يقدر يستجيب للروتين اللي بنحاول نعمله معاه.
من الالعاب اللي نقدر نلعبها مع الطفل في الفترة دي عشان ننمي مداركه:
• نحطه على الارض ونخلي لعبة بيحبها ابعد من مرمى ايده شوية.. عشان يحاول يوصل لها ويبتدي يزحف او يتدحرج.. المهم انه يحاول
• ممكن نلعب معاه لعبة افتح اقفل بايدينا او بالانجليزي close open نقفل ايدنا بالتزامن مع الكلام و حبة حبة هايبتدي يتعود
• ممكن نعرفه اصوات الحيوانات و ليكن حيوان في الاسبوع نفضل مثلا نقلد صوت القطة و نقوله قطة ميييييييياو ميييياااو، ونلعب ونضحك ونفضل نكرر دي طول الاسبوع كل ما جينا نلعب معاه وبعدين ننقل على حيوان تاني وليكن خروووف مااااء خرووووف مااااء و هكذا
• ممكن ننمي حاسة اللمس عنده باننا نخليه يلمس قطن او قطعة ساتان او حرير، و يلمس مثلا برتقالة او تفاحة وهكذا..
• و كمان نبتدي بقى نقوله با با .ما ما ببطء و بالراحة و هانلاقي الطفل بيحاول يعمل زينا..
• ممكن نلعب بايدنا كأن ايدنا فار او قطة و نقوله بص القطة جاية تلعب ميييااااو مييياااااو ميياااو و نحرك ايدينا باتجاهه
• و ممكن نلعب معاه لعبة البيضة.. اللي كلنا عارفينها ادي البيضة وادي اللي طبخها وادي اللي قشرها وادي اللي حمرها وادي النونو شافتها عيونو قااال عايز اكلها هممممم و نزغزغ الطفل.. و هانلاقي مع الوقت انه بيضحك من اول ما نقول ادي البيضة
• من السن دا ممكن نقول له شااااطر رااائع انت شطوووور
• و طبعا نقول باحبك.. حبيب ماما
• مفيد جدا كمان العاب عرايس اليد او البابت، ودي متوفرة بكثرة و نقدر نكلم الطفل بيها كتير اوي
• و يا سلام على لعبة بخ، نخبي وشنا بايدنا ونقول للطفل بخ و هاتشوفو الضحك اللي من القلب
و هنا نبتدي لما يعيط بدون داعي نتجاهله و لما يكون ساكت نلعب معاه
كمان مهم اوي اننا نبتدي نفصل نومه و نعمل روتين النوم بتغيير انه يكون نايم على سريره في اوضته بقى خلاص دا هايسهل علينا الحياة كتير
و على سن الاربع شهور نقدر ندخل الاكل عن طريق تجربة صنف واحد في الاسبوع، وكمية بسيطة جدا الطفل يدوقها مش هدفنا الاكل والاشباع، لاحظو ان معدة الطفل مش مهيأة لكدا دلوقت
بعض الابحاث بتقول ما نبدأش اي طعام صلب للطفل الا بعد اتمام ست شهور، بس انا اميل الى الاربع شهور نبتدي نخلي الطفل يدوق و بعد كدا نأكله معلقة من الصنف، وليه صنف واحد في الاسبوع عشان لو عنده حساسية نكتشفها انما لو اكلناه صنفين ممكن ما نعرفش مين اللي عمل الحساسية الى جانب ان الجهاز المناعي للطفل بيكون لسة ما اكتملش وبالتالي مش عايزين نصدمه بحاجة ما يعرفش يتعامل معاها
ممنوع العسل في اول سنة ممنوع الحليب البقري في اول سنة وممنوع الفول او مية الفول
نبدأ بحاجات مهروسة و الخضار ما يتحطش عليه ملح او اي توابل عشان ما نلعبش في قدرة الطفل على التذوق
وزي ما قولنا في السن دا بينام الطفل عشر ساعات بالنهار و اربع ساعات باليوم
ومهم ما نسيبش الطفل للتلفزيون خاااااااااااالص في المرحلة دي
دي مرحلة التواصل معانا احنا
و بيغلط كتير مننا ونسيب الطفل قدام التلفزيون او التليفونات الحديثة دا بيأخر نمو عقل الطفل و بيأخر تواصله الاجتماعي و بيأخر النطق و الكلام.. وبيزيد عنف و توتر الطفل في السن الصغير دي فدي حاجة يا ريت ننتبه لها.
الاطفال من سن 6 الى 9 أشهر:
على الجانب البدني يقدر الطفل يعمل حاجات زي:
• يميل لقدام
• الزحف
• يقعد مع مساعده
• بيستطيع التحكم بشكل افضل عضلات الايدين والرجلين ويبتدي يمسك الحاجة اللي عايزها بشكل افضل
• يشد الحاجات باتجاهه
• بعض الاطفال بتقدر تقف مع تسنيد بنهاية الشهر التاسع.
• على الجانب الاجتماعي والعاطفي:
• بيحب يتحضن ويتقال له باحبك كتير
• بيحب يبص في المراية ويشوف نفسه
• يشاور على الحاجة اللي عايزها
• الاستمتاع باسقاط الاشياء وبالتالي ماحدش يجي يقولي ابني بيحب يرمي الحاجة على الارض
• الرغبة في التعرف على ملمس كل حاجة يشوفها
• الاستمتاع باغاني الاطفال
• ابتدا يعرف جسمه والية تحريكه كويس وواعي له
• بيتكلم كلام غير واضح ودي بتزيد لما يكون الكبار بيقضوا وقت في الكلام مع الطفل
• الاستمتاع بالاستماع لمختلف الاصوات
على الجانب الذهني والفكري
• يقدر دلوقت يتعلم اسماء اجزاء الجسم
• يفهم استمرار وجود الاشياء
• يعرف يفهم اللعبة لما نلعبهالو
• بعض الاطفال بتعرف في اسن دا تتعامل مع التليفونات والاجهزة الذكية بس مش لازم نسيبهم اكتر من اجمالي ساعة في اليوم
لازلنا بنقول غلط نسيبهم قدام التلفزيون عشان دا بيسبب تأخر الكلام
الالعاب المقترحة للسن دا لتنميته
• الطفل بيستمتع بضرب الحاجات ببعضها فممكن نديله مكعبات خشب او حتى معلقتين خشب ونخليه يخبطهم في بعض دا بينمي عنده التوافق البصري العصبي العضلي. يعني بيخلي الطفل يسيطر على ايديه ويخبطهم في بعض كويس
• وبردو ممكن نعلمه التصفيق بنفس المبدأ
• ازحفو مع الطفل على الارض عشان دا بينمي العضلات وبيقرب بينكم
• ممكن نلعب بالكورة مع الطفل عن طريق دحرجتها على الارض ويرجع هو يكرر نفس الحركة في البداية قد لا يفهم الطفل الكلام دا بس مع التعويد والتدريب يقدر
• ونقدر لما يقعد نمسك ايشارب من طرف ونديله الطرف التاني يشده واحنا نشد في المقابل دا بردىو بيقوي العضلات
• بردو نقدر نلعب معاه بملمس الاشياء المختلفة. ايشارب حرير قطعة قطنية. فوطة ملمسها ناعم فوطة تانية ملمسها مش ناعم اوي
• ممكن نعلمه اسماء الجسم ولنبدا بالوجه والفم والعين. ونقدر نكرر الاسم اكتر من مرة يعني دي عين بودي. ونشاور له على عينه ىنكرر دا كام مرة وبعدين نقول له فين عين بودي. ولو شاور على عينه نصقف اوي ونهلل ونكررها ونشوف بقى الانف. والفم والايد والرجل وهكذا
ولازم نفهم ان كل حاجة بنعملها مع الطفل في السن دا تعتبر لعبه ممتعة ووسيلة تعليمية رائعة لتنمية مداركه فبلاش نضيع اي لحظة من غير ما نستغلها
الطفل ابتدا ياكل في المرحلة دي ولازم هنا نشير ان اوعو تقعو في فخ ان ابنك يحس ان الاكل وسيلة للضغط عليكي ويبتدي يتدلع وتبتدي تتحايلي وتدي تليفون وتلفزيون عشان ياكل. لا خلي في روتين للاكل يلبس البافتة يقعد على كرسيه وانتي تبقي البهلوان بتاعه عشان ياكل واول ما تلاقيه ابتدا يرفض الاكل شيلي الاكل لانه يعني مش جعان
نظمي مواعيد الوجبات وثبتيها عشان يجوع وما تقعديش تتحايلي
الايام اللي ابنك هايكون واخد فيها التطعيم مش هايكون عنده رغبة في الاكل معلش
ويوم التطعيم ادي خافض الحرارة اللي هايكتبهولك الدكتور كل اربع ساعات حتى لو مافيش حرارة ودا داي اغلب دكاترة الاطفال اللي استقصيت الموضوع عندهم لان خافض الحرارة دا بيكون مسكن للالم فبيساعد ابنك انه يتخطى مرحلة التطعيم
ما تعمليش كمادات مكان الحقن وما تحميش الطفل يومها. ما عنديش سند علمي على موضوع الحمام دا بس من تجربتي الطفل مش بيكون عنده رغبة اصلا
بعض الاطفال مش بيتعبو من التطعيم وبيكونو كويسين. فما تعمليش ازمة كبيرة. وما تتخضيش انه ما تعبش. التطعيم شغال ما تقلقيش
اوعي تقارني ابنك بحد تاني كل طفل فريد وكل طفل تجربة خاصة منفردة
الطبيب فقط هو اللي يعلق على نمو ابنك ووزنه وطوله. خالتك صفية وعمتك بهية مع خالص احترامنا ليهم مش خبراء ولا دكاترة لا دي تقولك ابنك خاسس ولا دي تقولك ابنك تخين كدا ليه. دا شغل دكاترة قضوا سنين من عمرهم بيدرسو الحاجات دي
بعض الاطفال بتااخر في الجلوس او الكلام كل دا بردو نناقش الدكتور فيه وبلاش الفزع والقلق. جداول النمو دي بردو فيها مرونة في الحدود الطبيعية
الطفل في السن دا بينام حوالي عشر ساعات ليلا واربعة نهارا
نظمي نوم طفلك
وانا انصح لو ماكنتيش فصلتيه في النوم انك تعملي دا
نظمي حياتك ونومك عشان يكون عندك طاقة
ما تستغربيش لو قولت ممنوع الضرب والزعيق في الطفل عشان في امهات بتزعق من دلوقت.
استمتعي مع ابنك في كل لحظة
المرحلة العمرية من 9الى ١٢ شهر
النمو البدني: يستطيع الطفل ان:
يزحف مع ابعاد بطنه عن الارض
تحريك القدمين بشكل افضل و هزها
يستمتع بادخال الالعاب الى الصندوق واخراجها منه
يسيطر بشكل افضل بكتير الى اصابعه
نقل الاشياء من يد الى اخرى واعادتها لليد الاولى من جديد
دحرجة الكرة ولو كان بيقف بعض الاطفال بيعرف يركل الكرة
التصفيق
التلويح بايده باي وهاتي
المشي بمساعدة
على الجانب الاجتماعي والعاطفي
يقدر يقول لا ويهز راسه يمين وشمال وفي الواقع دا هايستمتع جدا جدا جدا بقول لا فانتبهي لرد فعلك معاه
يحب النظر في الكتب
يحب تقليد الكبار
يضحك على الاشياء المضحكة زي انك تقعي على الارض بطريقة المهرجين مثلا
بدأ يقول بعض الكلمات
الجانب الذهني والفكري
• بيقول بابا لبابا وماما لماما يعني عارف المسمى للشخص الصحيح
• فهم معاني الكلمات بشكل افضل زي فوق تحت ورا
• الاستجابة للاسئلة زي فين بابا فين الكوباية
• تمييز الصور اللي في الكتب اوالمجلات
• بيحب جذب الانتباه
• يستجيب لاسمه بكل وضوح
• تظهر بعض المخاوف زي الخوف من الغرباء
• التعلق بالام
• وبيكون عنده صراع كدا ما بين بداية الاستقلال عن الام و تعلقه بيها
بينام الطفل في الفترة دي حوالي 11 ساعة بالليل وتلات ساعات خلال اليوم
الألعاب اللي نقدر نلعبها مع الطفل في هذا العمر:
• كل الألعاب اللي فوق و هانبتدي نشوف تطور رائع في استجابات الطفل لها
• نقدر نجيب كوبايات احجام مختلفة و في بعضها بيتباع جاهز على شكل لعبة ونخلي الطفل يحاول يدخل الاكواب او الصحون او الصناديق الصغيرة في الكبيرة
• كمان نقدر نجيب صندوق كبير و جواه مكعبات ونخلي الطفل يطلع المكعبات برة الصندوق ويدخلها مرة تانية
• القراءة والصور الملونة والكلام عن اللي بتشوفوه في الصور بيلعب دور كبير جدا في الثراء اللغوي للطفل و قدرته على التكلم ووصف مشاعره
• لو عندك سلوبيت او حاجة ليها سوستة طويلة ممكن تخلي طفلك يحاول يفتح ويقفل السوستة و دا له اثر على تطوير الحركة الدقيقة لاصابع الطفل في مسك الحاجات الدقيقة
• نقدر نعلمه اجزاء اكثر من الجسم
• هاتي البوم صور فيه صوركم وصور اقاربكم و ابتدي اسألي الطفل مين دي او مين دا و قولي الاسم او الصفة عمو خالتو بابا ماما
• تليفون لعبة او تليفون قديم و اتكلمي فيه و اعملي انك بتتكلمي عن الطفل، وبعدين اديله التليفون عشان يبتدي يقلد الكلام
• (كمان لعبة اننا نخبي حاجة تحت طبق كبير (بس خلي بالك حاجة مش بتتبلع) واسألي الطفل فين الحاجة دي..
• طبعا اي لعبة بتصدر اصوات زي الاكسليفون او البيانو بتخلي الطفل مبسوط
نصائح عامة بقى:
• الدراسات بتقول ان المشاية مش حاجة مفيدة ان نخلي الطفل فيها لفترات طويلة ولا وسيلة نخلص بيها من زحف الطفل تحت الحاجات لان الطفل اللي بيقضي وقت طويل في المشاية بيتحرم من فرص مناسبة لتطوير قدراته الحركية والفكرية، و استكشاف المحيط، وبالتالي خلي لها وقت محدود مش كل الوقت
• ما تلبسيش الطفل حذاء بدري، لان لحد الست شهور عظام القدم بتكون رقيقة جدا لانها مكونة بمعظمها من مادة الغضروف، فاذا تم حبسها في الحذاء الغضروف ممكن يتعرض للضغط واحيانا الاهتراء مما يعيق نمو العظام بشكل سليم
• الطفل بيحط كل حاجة في فمه، انتبهي للحاجات الصغيرة
• اللهاية او السكاتة وسيلة غير مستحبة لاسكات الطفل، لانه حسب اغلب الاطباء والمختصين، الى جانب انها بتشوه صورة الطفل ، فهي بتمنعه من التواصل مع المحيط، يعني بدل ما يعيط او يجرب يعمل اصوات عشان يتعلم الكلام بيكون حاطط البتاعة دي في بقه
• و كل ما طالت فترة استخدام الطفل للهاية كل ما كانت صعوبة تخليصه منها، فكأن الطفل بيتم فطامه مرتين،مرة من الام و مرة من السكاتة.
• انتبهي لوضعية الرضيع في السرير، كل الدراسات تنصح بوضع المولود على ظهره بدلا من بطنه، مع عدم وضع وسادة تحت رأسه وكل شوية روحي بصي عليه لتجنب حوادث الاختناق لا قدر الله.
• السكريات بتخلي الطفل متوتر ومهيبر ، حاولي تقللي منها خاصة في فترات الليل
• حاولي تعملي اكلات تتاكل بالايد زي البطاطس اللي افضل انها ما تكونش محمرة بل تكون في الفرن والكفتة و الجزر وخلي الطفل ياكل بايده مش مشكلة يبهدل الدنيا
• انتبهي من اعطاء الطفل خبز او خيار او اي خضار ممكن يتقطم عشان ما يزورش
• في فترة التسنين بيساعد الطفل جدا انك تحطي جزر في الفريزر وتديهوله دا بيسكن الالم اللي في اللثة
• اياكي ثم اياكي من الصراخ لما تصرخي من دلوقت بعد سنتين هاتعملي ايه هاترميلي نفسك من البلكونة!
• اياكي ثم اياكي من تخويف الطفل من العو ولا القطة ولا اي حاجة واللي تخوف ابنها ولا بنتها ما تجيش تعيط و تقول ابني جبان
• طبعا ممنوع نعلم الطفل الشتم او التف او الضرب او العض،
• لو الطفل ابدى شيء من العناد دي بداية استقلالية ودي اشارة طيبة جدا من الطفل فحاولي ما تعانديش قصاده كوني حاسمة ولكن بحنية، ولما يقول كلمة غلط ولكن بتضحك عشان بتطلع منه و هو صغير خلي بالك ان اول رد فعل هو اللي هايحدد علاقة الطفل بالكلمة دي او التصرف دا فلما تضحكي و تقوليله عيدها كتير يبقى انتي موافقة، ما تجيش تشتكي بعد كدا ان الطفل اخلاقه مش كويسة
• ممنوع منعا باتا تقبيل الطفل من الفم عشان نقدر بعد كدا نوعيه للتحرش الجنسي
فيما يخص موضوع النطق والكلام تحتاجي استشارة طبيب في الحالات التالية:
• اذا توقف الطفل او لم يبدي اي اشارات لمحاولات الكلام لحد سن ستة اشهر، هنا في احتمال كبير لوجود مشاكل في السمع
• اذا لم يصدر الطفل اي صوت او حتى يحاول او لو لم يتواصل بالعين في الاربع اشهر الاولى
• اذا استمر الطفل لحد الثلاث سنوات بيغلط في حروف يعني يقول على الكلب كل.. او يقول على الكرسي ارسي. تبقي محتاجة دكتور تخاطب بس تتأكدي ان الدنيا ماشية كويس
• ولكن انتبهي لما الولد بيكون متحمس اوي طبيعي يتلعثم في الكلام، دي حالة عادية اللي اقصده انه يكون دائما عنده مشكلة في تركيب الحروف مع بعضها لتكوين الكلمات لحد سن ثلاث سنوات
• لو كان الطفل ما بينطقش اي كلمة مفهومة لحد عمر الخمسة عشر شهر ، بما في ذلك بابا و ماما و اي و واوا..
• الطفل من سنتين لثلاث سنوات بيكون عنده حصيلة حوالي 300 كلمة، فما تقلقيش لو اول سنة ما اتكلمش كتير،
• كل ما تكلمتي مع الطفل و تواصلتي معاه كل ما كان فصيح و بيتكلم اسرع وافضل
الكلام مع الرضيع بيكون كالآتي:
• استخدمي جمل قصيرة
• تكلمي ببطء ووضوح ونبرة هادئة و مناسبة للموقف
• كرري الكلمات الجديدة في مواقف مختلفة
• انتبهي لما ينتبه له الرضيع وكلميه عنه، يعني لو بص لكرة حمراء، قولي له كرة حمراء، كرة حمراء كبيرة، نلعب بالكرةو هكذا
دي تقريبا كل حاجة تخص السنة الاولى من عمر الطفل
وختاما احب اقول التربية مش عملية سهلة ولكن اذا تم تعلمها بتكون عملية بسيطة و مفهومة ونقدر نطبقها، لازم نبذل مجهود ما ينفعش اربي من غير مجهود وما ينفعش اربي من غير تنظيم وقتي و ما ينفعش اربي من غير ما اقدر اتحكم في اعصابي
منقول من ا دعاء صفوت
منقول من ا دعاء صفوت
ليست هناك تعليقات:
إرسال تعليق