كل شيء عن التطعيمات

١. تطعيمات الصحة المصرية نعرفها بسرعة :

**شلل الأطفال(OPV) الجرعة الصفرية ،و الدرن (BCGالسّل) أول يوم .
**٦،٤،٢: الخماسى(دفتريا تيتانوس سعال ديكى انفلونزا بكتيرية كبدى 😎 + شلل الأطفال .
**٩ أشهر : شلل أطفال.
**١٢شهر: الثلاثى MMR(حصبة نكاف حصبة ألمانى) جرعة أولى+شلل أطفال .
**١٨ شهر : جرعة منشطة من الثلاثى (دفتريا تيتانوس سعال ديكى) و الجرعة الثانية والأخيرة من الثلاثىMMR(حصبة نكاف حصبة ألمانى)+شلل أطفال .

٢.التطعيمات الإضافية المشهورة، نعرفها بسرعة ، الروتا و المكور الرئوى والكبدى A والجديرى وطبعاً الإنفلونزا والالتهاب السحائى .

٣. التطعيمات الإضافية مهمة جداً ومش بزنس ولا حاجة !

٤. الروتا مهم جداً وبيقلل من شدة النزلات المعوية الحادة بنسبة ٨٥٪ ل ٩٥٪ ،، أول جرعة لازم تتاخد بين عمر (شهر ونصف) وبين (٤ أشهر و ٦ أيام) يعنى لو البيبي عدى ٤وأسبوع مياخدش الروتا وفيه منه نوعين روتاتك ٣ جرعات وروتاركس جرعتين بينهم شهرين ،، الاتنين بنفس الكفاءة ومفيش أبحاث مؤكدة تفضل واحد على التانى مع العلم ان آخر جرعة المفروض متعديش سن ال ٨ أشهر بأى حال من الأحوال.

٥. خلاص هتدّى ابنك الروتا ؟ ابنك معندوش نقص مناعة شديد مركب (SCID) ؟ متأكدة انه مجالوش انسداد معوى قبل كدة ؟ ولا عنده حساسية من اللاتكس (مطاط)؟ وقفتى الرضاعة قبل التطعيم ب نص ساعة - ساعة عشان البيبي يرضى يبلعه ؟ خلاص اخترتى النوع ؟ لأ ،، مينفعش تدّى الجرعة الأولى روتاتك والتانية روتاركس أو العكس ،، وبرضه متقلقيش من الانسداد المعوى ده نسبته نادرة ١-٤ : ١٠٠٠..!

٦. لو الحالة المادية تسمح ،،، ادّى كل التطعيمات الإضافية ،، تكلفة العلاج لو تعب لا قدّر الله أكتر بكتير من تكلفة التطعيم،، ده بغض البصر عن المضاعفات يعنى 😦

٧. الإنفلونزا الموسمى كمان مهم ، وبيحمى بإذن الله من ٩٠٪ من نزلات الانفلونزا ، أحسن وقت ايه شهر ١٠ و ١١ وإن كان ممكن يتاخد طول السنة ، لازم الطفل يعدى ٦ شهور ، وأول مرة بيتاخد جرعتين عضل مابينهم شهر ، بعد كده جرعة واحدة كل سنة ،، الأطفال اللى عندهم حساسية بيض شديدة يمتنعون ! أما طفح جلدى واحمرار خفيف مع البيض ياخدوه عادى

٨. المكور الرئوى (PCV) مهم جداً ، روتين ف أمريكا تحت ٥ سنوات ، ممكن يتاخد من سن شهر ونصف ، ٣جرعات بينهم شهرين وجرعة منشطة عند سنة ونصف ،، في نوعين بريڤينار (١٣سلالة) و سينفلوركس(١٠سلالات) ،، نظرياً بريڤينار بيغطى سلالات اكتر ، عملياً لسه محتاجين سنين لإثبات الفرق ،، بيحمى بإذن الله من التهابات الرئة و بعض أنواع الحمى الشوكية (السحايا) والتهابات الأذن الوسطى وبيدى مناعة من ٤٥-٧٥٪ .

٩. رأى شخصى :

أحسن مكان ابنك ياخد فيه التطعيم مركز المصل واللقاح بفروعه المختلفه ، وبعديه الدكتور بتاع طفلك لو بيدّى التطعيمات ،، مش كل الدكاتره بيدّوها ومش عيب ولا يقلل منه .

١٠. الكبدى A والجديرى أقل سن يتاخدوا فيه سنة ،، والجرعة التانية والأخيرة تتاخد عند سنتين (الكبدى A) أو ٤سنوات (الجديري ) أو قبل كده حسب الجدول.

١١. تطعيم الحمى الشوكية "meningococcal vaccine" مش مطلوب قبل سن سنتين الا لو في وباء منتشر او الطفل مسافر لمكان متفشي في الاوبئة فممكن يتاخد من سن شهرين كمان ! لو اتاخد عند سنتين تبقىالجرعة التانية عند ٧سنين ،، ولازم الطفل ميكونش جاله متلازمة "جيان بارى GBS" قبل كده ، بيحمى بإذن الله من التهابات المخ والحمى الشوكية البكتيرية .

١٢. تطعيم الدرن له جرعة منشطة عند ٤ سنوات بس لازم نعمل اختبار حساسية قبلها .

١٣. ينفع ادّى كل أنواع التطعيمات في نفس اليوم ، الأساسية والإضافية ، وده الأحسن على فكرة *.

١٤. ينفع أدّى كل التطعيمات الإضافية بعد أو قبل التطعيمات الأساسية ومش لازم فرق شهر إلا في حالة الجديرى المائى بعد تطعيم (MMR)، لو ماتاخدوش ف نفس اليوم لازم فرق شهر😈.

١٥.ينفع أدّى كل التطعيمات التى تعطى بالفم في نفس اليوم اللى ادّى فيه التطعيمات في العضل عادى خالص .!

١٦. صدمة⚡⚡⚡
ينفع أدى تطعيمين بالفم (شلل الأطفال و الروتا مثلاً ) في نفس اليوم أو بعد أو قبل ومش لازم فرق شهر ولا حاجة

١٧. لو اتأخرتى على معاد تطعيم طفلك مفيش أى مشكلة طعّميه ونكمل باقى الجرعات على أساس تاريخ التطعيم الجديد ، ومفيش داعى نزود جرعة ، ومش هيحصل أى ضعف في المناعة بعد إكمال الجرعات كلها نتيجة تأخير التطعيم *.

١٨. لو عاوزه تطعمى طفلك بدرى عشان ظروف السفر للخارج مثلاً فده ممكن بس ميكونش قبل أقل مسافة زمنية مسموحة بين الجرعتين ، يعنى أيوا ينفع تطعمى الخماسي ،٣،٢ بدل ،٤،٢ ،، وكل تطعيم ليه "أقل مسافة زمنية بين الجرعتين " خاصة بيه موجودة في اللينك دا http://www.cdc.gov/…/do…/appendices/A/age-interval-table.pdf

١٩. ليكى كمان "فترة سماح ٤ ايام"4days grace period ممكن تدّى فيها التطعيم قبل "أقل مسافة زمنية بين الجرعتين " ويبقى التطعيم صحيح وكل حاجة ابسطي يا ست الكل 😉

٢٠. لو مكان الحقنة "ورم" او "احمَرّ" أو"وجع البيبي" خلال ساعات فده عادى جداً وهيختفى بسرعه ،، مطلوب بس كمادات بارده و سيتال لمدة ٢٤ ساعة ،، الحرارة ورفض الأكل وال "همدان" وال"قريفة" مقبولة جداً لحد أقصى ٣ أيام غير كده نكشف .

٢١. تطعيم السنة "MMR" و"الجديرى المائى" بالذات مقبول خلال ٣-٢١ يوم ظهور أعراض زى نزلات البرد (رشح وزكام وكحة) خفيفة او طفح جلدى خفيف ،، متنسوش ان التطعيم ده أصلاً عبارة عن الڤيروس نفسه بس ضعيف جداً فممكن أعراضه تظهر بدرجة بسيطة،، منقلقش ومناخدش علاج.!

٢٢. لو حصل لطفلك حساسية من أى مكون من مكونات التطعيم وقفى الطعم للأبد😩

٢٣. صدمة ٢ ⚡⚡⚡
الجديد ان اللى عنده حساسية البيض ياخد MMR عادى.😈

٢٤. تدهور وظائف المخ(Encephalopathy) خلال ٧أيام بعد السعال الديكى مياخدش السعال تانى!

٢٥. اوعى الدكتور يدّى ابنك الروتا وهوا عنده مرض نقص المناعة الشديد المركب(SCID) أو جاله انسداد معوى قبل كده 😧.

٢٦. لو ابنك عيّط بشكل مستمر بلا توقف > ٣ ساعات ، أو اتشنج خلال ٣ أيام أوسخن > ٤٠ سلزيوس أو جاتله صدمة وهبوط خلال يومين من تطعيم الدفتريا والسعال والتيتانوس يبقى يوقف كل الجرعات اللى فيها سعال وياخد دفتريا وتيتانوس بس لغاية البلوغ .!

٢٧. صدمة ٣ ⚡⚡⚡

الأطفال اللى عندهم أمراض عصبية وتشنجات عشان أسباب تانية غير تطعيم السعال- صرع او شلل دماغ مثلاً- وحالتهم مستقرة ياخدوا تطعيم السعال الديكي عادى جداً

٢٨. أى مرض متوسط أو شديد نأجل التطعيم لما يخفّ (يعنى نزلة برد بسيطة عادي أو إسهال بسيط عادى يتطعم ) .

٢٩. العلاج بأجسام مضادة في الدم قبل تطعيم ال "MMR و الجديرى"برضه نأجل التطعيم لغاية ما يعدى ٣ أشهر وبعدين نطعّم.!

٣٠. نقص المناعة المؤقت ( علاج كيماوى أو كورتيزون مثلاً) نأجل تطعيم MMR و الجديرى و الروتا .

٣١. الطفل اللى بيتعالج بكورتيزون مبنعتبروش نقص مناعة الا اذا استمر ١٤ يوم او اكتر على بريدنيزون ٢مل/كجم يوميا أو >٢٠ مل يومياً شراب أو حقن ،، يعنى طفلك اللى بياخد اقل من كده جرعات او ايام أو بيبدل أيام آه وايام لأ او بخاخة حساسية أو دهان كورتيزون ده يتطعم عادى معندوش نقص مناعة.

٣٣. الأمراض الخفيفة كالتهاب الأذن الوسطى والبرد والإسهال البسيط وارتفاع الحرارة البسيط (لا يوجد رقم محدد) ابنك يتطعم معاها عادى والله 😎

٣٤. لو ابنك بياخد بمضاد حيوى يتطعم عادى ماعدا السبترين يقف قبل يومين من تطعيم التيفويد.👍

٣٥. ولو بياخد مضاد فيروسي زى (أسيكلوڤير وزوڤيراكس ) يتطعم عادى كل التطعيمات بس يقف قبل يومين من ال MMR "تطعيم السنة والسنة ونصف"

٣٦. حملات شلل الأطفال مهمة ، كل اما تلاقى حملة ارشقى ابنك فيها☺☺ ،، بشرط !! يكون عدّىٰ على تطعيم شلل الأطفال في الصحة شهر كامل قبل الحملة ومياخدش أى تطعيم شلل أطفال لمدة شهر بعدها ،، عشان منلخبطش جهاز المناعة ،، تمام ؟😉😉

٣٧. حقنة الكتف الشمال ( الدرن ) بتسيب خشونة خلال أسبوع أو أسبوعين ،، و"بثرة "-جزء مرتفع قليلا من الجلد خلال أسابيع لأشهر ،، لو ملقيتيش التفاعل ده عادى جداً مش لازم كل الأطفال يسيب أثر ،، ولو عمل خراج أو صديد أو حيل تحت الإبط أو حرارة عالية وكحة استشيرى الطبيب فوراً 😧

٣٨. مفيش بروتوكولات بتقول إجبارى إيقاف الرضاعة قبل ولا بعد التطعيم😈 ،، الموضوع على حسب الطفل لو البيبي بيرضع واستحالة يدخل حاجه ف بقه لما يشبع يبقى جوعيه شوية ولو بيقشط دايماً بعد الرضاعه مترضعيش لمدة نص ساعة لساعة عشان التطعيم يلحق يوصل للأمعاء قبل ما يرجّع 😀😀

انما اللى بيحصل دا مجااااعة 😂😂😂

٣٩. الأطفال المولودين قبل إكمال ٣٧ أسبوع "الخُدَّج" الصح انهم ياخدوا التطعيمات حسب العمر الزمنى ،، يعنى زى أى طفل مكتمل ، مع تأجيل اعطاء تطعيم الكبدى B حتى يبلغ ٢ كغم أو شهراً من العمر أيهما أسبق (ده طبعا في حالة الأم المصابة بڤيروس بي) .!