علامات الفطام ... علامات بداية ادخال الطعام للبيبي

الفطام هنا مش معناه إني أوقف رضاعة لأ معناه بداية ادخال الطعام اللي بيكون بعد 180 يوم من الرضاعة الطبيعية فقط ( وفق منظمة الصحة العالمية) وده بيكون بداية للفطام النهائي عند سنتين

• هتلاقي ابنك عايز ياكل وبيمد ايده على الأكل كأنه جعان
• قصر الفترة بين فترات الرضاعة وعشان كده هتلاقيه يصحى بالليل كتير علشان يرضع
• أي حاجة يمسكها يحطها في فمه

بس خلي بالك في أوقات قبل كده هتلاقيه يصحى كتير عايز يرضع وبالنهار كمان هتلاقيه عايز يرضع كتير الفترة دي بنسميها طفرات نمو ... يعني لما بيرضع كتير بيدي إشارة للمخ علشان يدي إشارة للثدي بادرار لبن اكتر يتناسب مع احتياجات البيبي اللي بتتغير في الفترة دي ...
طفرات النمو بتكون علامة على نمو الطفل وتغير احتياجاته وتوقعي فيها أنه يرضع أكثر على مدى 48 ساعة إلى أسبوع، وبعدها يعود إلى حالته الطبيعية الأولى مرة أخرى. وخلال طفرات النمو هذه، توقعي أن تعاني من الحرمان من النوم ... 

نخلي بالنا ونخلي تجربة ادخال الاكل حاجة لذيذة ووقت ممتع وممنوع تغصبي عليه ياكل أولا علشان ميكرهش الاكل وثانيا علشان لازم تحترمي رغبته

• اختاري الوقت المناسب اللي هتقدمي فيه الاكل ويكون الوقت ده مش وقت نومه وكمان يكون مزاجه حلووكمان مش عايز يرضع لأنه لو عايز يرضع وقدمتي الاكل مش هيقبله
• ممكن كمان تشمميه الاكل الاول ويشوفه وممكن يلمسه بإيده الطفل في المرحلة دي عايز يستكشف كل حاجة عامل فيها المفتش كرومبو ههههه

هنبدأ ازاااااااااي
أول حاجة اسلقي كوساية مثلا أو اعمليها على البخار وده أحسن علشان نحافظ على القيمة الغذائية الللي فيها
اهرسيها كويس خالص او اضربيها في البليندر ( الخلاط) وخليها مش ماية ولا جامدة خليها نص نص
في أول يوم لما تلاقي مزاجه حلو كده دفي الأكل شويه وهيه معلقة واحدة هندوقه ونشوف رد فعله وبعدين نكمل الباقي رضاعة
تاني يوم هنزود الوجبة بدل معلقة خليهم اتنين ونكمل رضاعة وهكذا كل يوم نزود شوية ونتابع الطفل واستجابته للاكل ونشوف لو حصل امساك أو اسهال أو حساسية على الجلد نوقف الأكل ده على طول ونستشير الطبيب لو محصلش حاجة خير نكمل ونعتبر دي وجبة

ملحوظة

• كل صنف نقدمه للطفل لازم نجرب كده خمس أيام لأسبوع علشان نشوف استجابة الطفل
• متستخدميش الببرونة في تقديم الاكل للبيبي احنا عاوزين نحرك الفك ونقويه ... أكل البيبي بالملعقة والطبق

بعد كده نثبت ميعاد الوجبة دي وليكن الافطار بعد كده نزود ميعاد جديد وليكن الغدا وبرضه بنفس الطريقة
الرضاعة مهمة جدا لازم نستمر عليها
حاجة كمان مهمة لو ابني محبش أكل معين اغيرله الأكل وأقدمه بعد كده بأسبوعين أو شهر علشان التذوق عنده بيختلف من فترة للتانية

وبعد مثلا مجربت الكوسة وحبها نضيف جزر اوبطاطس وبرضه نفضل نجرب بنفس الطريقة اللي فاتت

بالنسبة ليا أنا مستعملتش أي منتجات من بره البيت زي سيريلاك او هيرو كل اكل ابني كان معمول في البيت
السيريلاك كنت بعمله :بطحن شوفان او رز في المطحنة لغاية لما يكون بودرة واطبخه مع ماء مغلي واضيفله فاكهة أو خضارمسلوقين ومهروسين زي ما أنا عاوزة